Biz yaxınlarımızla münaqişədə oluruq: ər – arvad, valideynlərlə uşaqlar, bacı-qardaşlar, gəlin-qaynana və s. Rahat yaşaya bilmirik. İllərlə Rahat və xoşbəxt yaşayan ailə yoxdur. Hər bir ailədə söz-söhbət olur.

Nə baş verir? Mübahisələrin səbəbi nədir? Ailələrin dağılmasına aparan dava-dalaşların səbəbi nədir?

Bunlardan söhbət açacayıq.

Başlıca səbəblərdən biri gənclərin yaşadığı, gördüyü ailə modelidir. Münasibətlərin kəskin olduğu ailələrdə böyüyənlər öz şəxsi ailə həyatında da aqressiv olur.

Valideynlərin müdaxiləsi də boşanmalarda mühüm səbəblərdən biridir. Gəlin və ya kürəkənlə olan münasibət düzgün qurulmadıqda boşanma ehtimalı yaranır.Cütlüyün münasibətində onlara bütöv kimi deyil, oğlum və ya qızım kimi yanaşma vəziyyəti gərginləşdirir.Ana və ya ata övladını haqlı çıxarmağa çalışdıqca mübahisələr həllini tapmır.

Əksi də səbəb ola bilir. Valideynlərin sözünü saymazdan gəlmə də, "özümüz bilərik” yanaşması da münaqişələri boşanmaya aparır. Burda cütlüyün öz yanaşması da önəmlidir. Valideynlərlə düzgün, səmimi münasibət yaratmaq gərəkdir.

Ən mühüm səbəblərdən biri də cütlüyün "mən”ini qoruma istəyidir. Bu tərəflərdən biri olsa belə, ailədə gərginlik olur. Uzun müddət tanış, sevgili olsalar da, birlikdə yaşamın fərqli tərəfləri var. Burda qarşılıqlı anlaşma, uyğunlaşma çox önəmlidir. Ailəyə "mən olmaqdan çıxıram” düşüncəsiylə yanaşmaq olmaz. Qarşılıqlı güzəşt vacibdir. Ailədə, birlikdə "mən” olmaq deyil, "biz” olmaq gərəkdir.

Bəzilərinə sadəcə etiraz etmə xasdır. Adətən daha çox qadınlar razılaşmaq məcburiyyətində qalır. Bu da sonda ciddi narazılığa səbəb olur. Hətta ayrılıq olmasa belə ailədə xoşbəxtlik olmur. Belə ailələrdə inamsızlıq yaranır. Cütlük güvənsiz yaşayır.

Mübahisə etməyi münasibət bildirmək kimi anlayır çoxu. Qadın və ya kişi bəzən razılaşmağı tabeçilik kimi qavrayır. Biz qayğını da çox vaxt düzgün ifadə etmirik. Əmr verirmiş kimi deyil, "Hava soyuqdur, başını örtsən yaxşı olar, əzizim” xahiş kimi də qayğımızı ifadə edə bilərik. Daha gözəl olmazmı? Olar. Qayğı sevgidən qaynaqlanır. Amma çox vaxt münasibətlərdə daha çox haqlı görünmək məqsədi qabarır.

Psixoloqların qənaətinə görə ailələrdə bir-birinə xoş sözlər demək, tərif etmək kimi vərdişlər çox azdır. Axı, ailələr sevgi üzərində qurulur adətən. Niyə bu sevgini hər an, hər gün hiss etdirmirik. O sənin qayğına qalırsa, təşəkkür etmək olar. Hər gün ürək açan sözlər söyləmək olar. Daha səmimi olun.

Haqlı olan, hökmlü olan siz olmayın – SEVGİ olsun.