Kürdüstan bölgəsinin bəzi yerləri də daxil, Məşhəd, Şiraz, Buşehr və Sənəndəc şəhərlərində müəllimlər dərslərə getməkdən imtina ediblər, BBC News Farsca bildirir. Bazar ertəsi bir qrup təqaüdçü Tehranda keçirilən etiraz aksiyasına qatılıb.

Mədəniyyət İşçiləri Həmkarlar İttifaqının Əlaqələndirmə Şurasının çağırışından sonra yer alan aksiyanın iştirakçıları təhsil sahəsinə yönəldilən vəsaitlərin artırılmasını, əməkhaqqının inflyasiya ilə uzlaşmasını tələb ediblər.

Təşkilatçılar müəllimləri sinif otaqlarında, hökumət və parlament qarşısında oturaq etiraz aksiyasına çağırıblar.

Günaz.tv saytı bu gün Tehranda, bir qrup təqaüdçünün etiraz çıxışı barədə informasiya yayıb. Məlumata əsasən, Milli Məclisin binası qarşısında toplaşan aksiya iştirakçıları "təqaüdlərin mövcud bahalığa əsasən verilməsini və məhbus həyatı yaşayan fəalların azadlığını tələb edən plakatlar tutublar".

 

 

İranlı təqaüdçülər illərdir ki, məvacib səviyyəsi baxımından "ayrıseçkiliyə" məruz qaldığını deyirlər.

Liberal dairələrin Mardom-Salari nəşri 19 dekabrda dərc etdiyi yazıda ölkədə pensiya böhranının yaşandığını bildirir.

2018-ci ildə ABŞ sanksiyalarının bərpasından sonra İran iqtisadi təzyiqlə üzləşməkdədir.

Noyabr ayında yanacağın bahalaşması etirazlara təkan verib. Aksiyalar daha kasıb bölgələrdə başlasa da, tezliklə ölkə boyu yayılıb.