Qadinkimi Gunaz TV-yə istinadən xəbər verir ki, İran Ali Məhkəməsinin 11-ci şöbəsi noyabrın 16-da güney azərbaycanlı öyrənci fəal Pərisa Rəfii barəsində hökm çıxarıb.

Bu barədə Pərisa Rəfiinin anası Twitter səhifəsində məlumat paylaşıb.

Bildirilir ki, İslam Cəza Qanununun 134-cü maddəsinə əsasən (Əşədd-i mücazat) azərbaycanlı gənc qız barəsində verilən həbs cəzasının 5 ili icra olunacaq.

Pərisa Rəfii bundan əvvəl birinci instansiya məhkəməsində 7 il həbs və 74 şallaq zərbəsinə məhkum edilib. Bundan əlavə, məhkəmə öyrəncinin 2 il müddətinə ölkədən çıxışına qadağa qoyub və hər hansı siyasi qrupa üzv olmaq hüququndan məhrum edib.

Fəalın vəkili Səid Xəlili sentyabrın 25-də İnstaqram səhifəsində qızın məhkəmə işi barədə yazıb ki, birinci instansiya məhkəməsinin hökmü bütün iradlara baxmayaraq Apellyasiya Məhkəməsində təsdiqlənib.

22 yaşlı öyrənci Tehran İnqilab Məhkəməsinin 26-cı şöbəsində "ölkənin təhlükəsizliyini pozmaq niyyəti ilə sözləşmə və toplaşmada iştirak etmək”, "sistemin əleyhinə təbliğat aparmaq” və "ictimai nizam-intizamı pozmaq” kimi qondarma ittihamlarla üzləşib. O, ittihamlara görə toplam olaraq 7 il həbs cəzasına məhkum edilib.

Zəncanlı tələbə 2018-ci il fevralın 25-də təhsil aldığı Tehran Universitetinin qapısının önündə İslam İnqilabı Keşikçilər Korpusunun ("Sepah”) təhlükəsizlik bölümünün əməkdaşları tərəfindən saxlanılaraq Evin zindanının 209-cu korpusuna aparılıb. 23 gün təknəfərlik kamerada saxlandıqdan sonra martın 19-da mülki vəsiqə qarşılığında müvəqqəti olaraq sərbəst buraxılıb.

Azərbaycanlı qız saxlandığı müddətdə "bakirəlik testi” və edam edilmə ilə təhdid edilib, ağır cismi və ruhi işgəncələrə məruz qalıb.

Fotoqrafiya üzrə təhsil alan Pərisa Rəfii Tehran Universitetində mədəni və qanuni fəaliyyətlə məşğul olub.

Gunaz.tv

qadinkimi.com